DFI Wānanga 9

Tēnā tātau katoa! Ka tīmata taku rangitaki ki te kupu 'Obiquitous', Kei raro iho nei ngā whakamahuki e ai kia Manaiakalani:

Ae e whakapono ana au ki tēnei whakatau a  Manaiakalani, he pērā hoki ngā whakaaro a te Māori ki te ao Matauranga. E kore tēnei mea te Mātauranga i oti, e mutu rānei, ā, ka mutu tēnei mea te Mātauranga ia  koe e mate ana. He mea tākohatia ōu whēako, ōu mātauranga ki ngā whakatipuranga kei te heke mai. Nā reira he mea  nui te te whakatinana i te kupu 'ako' kia kīkia tō kete hei tākohatia ki te hunga pīkoko.

Nā runga i te mate karauna, kua kitea te panonitanga o te mātauranga ki ngā kura. He mea whakaako māi tawhiti, mai tata hoianō he mea ako mā te ao matihiko. He nui ngā hua mā tēnei huarahi engari kei reira tonu ōnā āwangawanga. Ko te hua nui, ehara i te mea me tae ā tinana noa ki te kura ki te ako i ngā kaupapa huhua, engari ka tāea te haria ngā kaupapa ako ki te kainga, ki rohe kē puta noa i te ao whānui. Koira e whakataukitia ai a Manaiakalani, 'anywhere, anytime, any place'. Akene pea ko te āwangawanga pea o tēnei, me whai rorohiko me te ipapa hei take ako ā-matihiko, ka rua he whai ipurangi tōu whare, wāhi e nōhia nei koe e tāea ai te whakamahi, te ako ā-matihiko. I te mutunga iho, ko te rauemi te mea nui! Nā runga i tēnei, kei te whāia ngā kura katoa i te huarahi whakaako ā-matihiko, hei painga mā te katoa, ā,  mā te hunga rawa kore hoki.

Koinei te manu weriweri nei o Amerika e kī anei 'Proctoru'

He whakamātautau ā mihini o Amerika tēnei. Akene pea he tuāpapa tēnei ka whāia e te toenga o te ao mō ōnā whakamātautau a Matihiko. Ka waiho mā te mihini hei whakatau i ōu tutukinga. He hōhā katoa te urutomo atu ki roto i ngā whakamātautau, ā, he iti hoki te wā me tutuki ia koe i te whakamātautau; ahakoa 3 hāora te roa, he iti te wā ki ahau.

Hoianō he tuatahitanga tēnei mōku, ka tāea e au te kī atu, kua tutuki i ahau te whāinga o tēnei wānanga te DFI o Manaiakalani. Katahi ngā akoranga Matihiko tākohatia ki te hunga pīkoko. Ehara i te mea me matatau koe ki te ao matihiko hei urutomo atu ki ēnei tūmomo wānanga. Engari he mea me ngākaunui ana  te tangata ki tēnei huarahi hei oranga mōu, mo te katoa hoki. Kāre e kore me whāia e au tēnei ara hīkoinga nā runga i taku tūmomo mahi. Mēnā he pouako koe,  me whai whakaaro ki ngā reanga me ngā whakatipuranga o tēnei rautau, i te mea kua whererei mai rātau ki te ao matihiko, te ao hangarau nei. Waihoki koinei te ao e mōhiotia nei e rātau, ā, he mea me pakari te kaiwhakaako ki tōnā ao, e tipu māhorahora ana ki te ao whānui.  Nō reira:

Ko te manu e kai ana te mātauranga, nōnā te ao.

Ko ngā kupu whakamutunga, kia koutou aku hoa mirumiru, tēnei ka tuku i ngā whakamiha kia koutou me ā koutou manaakitanga ki ahau, taenoa kia koe e te ika-āwhiro e Makaore, e kore ngā mihi e oti kia koe!